ఆ మద్య ఒకతను రోడ్డుపై కనిపించి మా ప్రాంతంలో గ్రోసరీ స్టోర్ ఒకటి పెడుతున్నడని చెబుతూ పేంప్లట్ నా చేతికిచ్చాడు. వెంటనే అతను ఎంతో శ్రమించి ఈ గ్రాసరీ స్టోర్లను మొత్తం దేశంలో అన్ని ప్రాంతాల్లో పెట్టేసినట్లు, ఒక బ్రాండ్ నేం సృష్టించినట్లు, తన సక్సస్ స్టోరీని టీవీల్లో చెప్పేస్తున్నట్లు, ఎంతోమందికి మార్గదర్శకంగా నిలిచినట్లు ఒకటే ఆలోచనలు వచ్చేశాయి. ఏమయ్యిందో తెలీదు నాకీ మద్య. ఎవరైనా ఇంటర్వ్యూకి వెళ్ళినా, వ్యాపారం మొదలుపెడుతున్నారని చెప్పినా ఒకటే ఇలాంటి ఆలోచనలు వచ్చేస్తున్నాయి.
ఈ మద్యనె “www.ted.com” చూసిన ప్రభావం అనుకుంటా. ఎవరైనా ఏమైనా చెయ్యగలరు. చెయ్యాలనుకోవాలంతే! అని నా మనసులో గాఢంగా ముద్రపడిపోయింది. టెడ్లో ఎంతోమంది స్పూర్తిప్రదాతలను కలుసుకునే అవకాశం కలిగింది. స్టీవ్ జాబ్స్, ర్యాండీ పాష్, జే.కే.రౌలింగ్, విలియం కంక్వబ, సునిత క్రిష్ణన్…ఒక్కొక్కరిది ఒక్కో కధ.
స్టీవ్ జాబ్స్ డబ్బులేక కాలేజికి వెళ్ళలేని స్థితినుండి, అంచలంచలుగా ఎదిగి యాపిల్లో భాగస్వామ్యం సాధించి, మళ్ళీ అతనికి 30 ఏళ్ళప్పుడు ఆ కంపినీనుండి తప్పుకోవలసిన పరిస్థితికి చేరుకొని, అక్కడ నుండి మళ్ళీ మొదటి నుండి మొదలుపెట్టి ఒక కంపెనీ పెట్టి, దాన్ని యాపిల్తో కలిపే స్థాయికి పెంచి, ఊపిరి పీల్చుకుంటుండగా క్యాన్సర్కు గురయ్యి, దాని నుండి బయటపడి…అతని జీవితంలో ఎన్ని ఎత్తుపల్లాలు?! నేను ఎంతో స్పూర్తి పొందాను అతని మాటలు విని.
ర్యాండీ పాష్ సీ.ఎం.యూలో కంప్యూటర్ సైన్స్ ప్రొఫెసర్. అతనికి “pancreatic cancer”. చనిపోయే ముందు అతను ఇచ్చిన లెక్చరే “last lecture”. “నాకు సంతోషంగా ఉండటం తప్ప ఇంకోలా ఉండటం చేతకాదు” అంటారాయాన. అందుకే చావు కూడా అతని సంతోషాన్ని తీసుకెళ్ళలేకపోయింది. అతని ధైర్యం చూసి ఒళ్ళు గగుర్పొడిచింది నాకు. అతని జీవిత విశేషాలు, అతనికున్న విలువలు, అతని విజయాలు …మొదలైన వాటి గురించి చెప్పారు. అన్నిటికంటే నాకు నచ్చింది “మన జీవితంలో అడ్డుగోడలు మనతో పోటీపడేవాళ్ళలో బలహీనులను ఆపటానికి ఉంటాయి. ఆ విధంగా పోటీని తగ్గిస్తాయి.”అని ఆయన చెప్పిన మాటలు.
కంక్వబ ఆఫ్రికాలో ఒకానొక కరువు పీడిత ప్రాంతాల్లో-ఆకలిని తగ్గించుకోటానికి మొక్కల వేళ్ళ నుండి తీసిన రసం త్రాగేంత కరువు పీడిత ప్రాంతంలో కరువు కారణంగా చదువు మానెయ్యాల్సి వచ్చి, ఖాళీ సమయంలో వచ్చిరాని ఇంగ్లీషుతో ఒక ఫిజిక్స్ పుస్తకం చదివి, ఉన్న అరకొర సామానుతో ఒక విండ్మిల్ తయారు చేశారు. ఇదేదో సినిమా కాదు. నిజంగా జరిగింది. మనమే పనైనా చెయ్యాలనుకోవాలే గాని చెయ్యగలం అనటానికి ఇంతకంటే నిదర్శనమేముంది?
పద్నాలుగేళ్ళ వయసులో ఒక గుంపు చేతిలో అత్యాచారానికి గురయ్యి ఈ రోజు అలా బాధింపబడే వేలాదిమందికి అండగా నిలిచిన మహిళ సునీతా క్రిష్ణన్. చాలామందికి ఆ బాధనుండి కోలుకోవటానికి ఒక జీవిత కాలం కూడా సరిపోదు.
ఇలా ఎంతోమందిని ఆ వెబ్సైట్ ద్వారా కలుసుకున్నాను. జీవితాన్ని ప్రయోజనకరంగా ఎలా గడపాలో తెలుస్కున్నాను. అలా గడపటానికి ప్రయత్నిస్తున్నాను. మనవల్ల ఈ ప్రపంచానికీ, మనకీ ఏదో ప్రయోజనమైతే మాత్రం ఉండాలి. ఆ ముక్క అర్ధమయ్యింది.
